Në Amerikë flitet për këtë fenomen si për një fakt të mirëqenë: jemi në recesion romantik. Siç shkruan Faith Hill në një analizë për The Atlantic, nuk po shohim thjesht fundin e ngadaltë dhe të heshtur të romancës amerikane. Ky fenomen është global: studime të ndryshme tregojnë se “jeta single është më e mirë” është një ndjesi që po përhapet kudo, veçanërisht mes grave.
Hendeku ideologjik midis burrave dhe grave
Sipas analistëve, po shohim një ndarje ideologjike të thelluar mes burrave dhe grave. Arsyeja? Gratë po bëhen më progresive me një ritëm shumë më të shpejtë sesa burrat, të cilët shpesh reagojnë me ideologji patriarkale dhe maskiliste.
Një pjesë e burrave mbështesin retorika si “ne mbrojmë gratë, edhe nëse ato nuk e duan këtë”, madje ironizojnë sloganin feminist “My body, my choice” duke e kthyer në “Your body, my choice”. Kjo qasje e thellon edhe më shumë përçarjen dhe i bën gratë të hezitojnë të hyjnë në marrëdhënie romantike.
Gratë single nuk janë më të stigmatizuara
Sipas një studimi të Social Psychological and Personality Science, gratë heteroseksuale beqare janë më të lumtura sesa ato në një lidhje. Madje, edhe më të lumtura se burrat single.
Kjo ndodh sepse:
Nuk vuajnë më stigmën sociale që dikur i quanin “lënesha” (të mbetura beqare).
Nuk kanë barrën e punëve të shtëpisë, që në shumicën e rasteve ende bie mbi gratë kur janë në një lidhje.
Kanë rrjete të forta sociale me gra të tjera, ndërkohë që burrat e varin jetën sociale nga partnerja.
Rezultati? Burrat single ndihen më të vetmuar, ndërsa gratë gjejnë mbështetje tek njëra-tjetra dhe ndërtojnë jetesa të pavarura e të pasura.
A mund të jemi më kërkuese? Po!
Sipas studiueses Alice Evans, shoqëritë moderne po përjetojnë një ndryshim radikal në mënyrën e lidhjeve romantike. Në të kaluarën, martesa dhe mëmësia ishin të detyrueshme për gratë, ndërsa beqaria përbënte turp. Sot, me liberalizimin e shoqërive, gratë mund të jenë më kërkuese dhe të zgjedhin më mirë.
Dhe nëse opsionet nuk janë të mira – nëse burrat janë të mërzitshëm, të dhunshëm, manipulues ose të pabesë – gratë thjesht zgjedhin të mos jenë në një marrëdhënie.
Një fenomen global: Nga Irani në Europë
Ky ndryshim nuk po ndodh vetëm në Amerikë.
Në Iran, numri i martesave ka rënë nga 800,000 në 480,000 brenda një dekade, pavarësisht politikave inkurajuese.
Në Turqi, ka një rënie prej 20% në dy dekada.
Në Bashkimin Europian, numri i personave që jetojnë vetëm po rritet me ritme të shpejta.
Në Itali, sipas të dhënave të Istat 2022-2023, numri i njerëzve që jetojnë pa partner është dyfishuar, nga 10.9% në 22.1% në grupmoshën 25-64 vjeç.
Dashuria e vërtetë dhe barazia: Çelësi për të ardhmen
Në fund të fundit, me zhdukjen e detyrimit social për t’u martuar, vetëm marrëdhëniet e bazuara në dashuri, respekt dhe barazi kanë kuptim. Por ndërsa shumë burra dëshirojnë t’i rikthejnë gratë në një status tradicional të nënshtruar, gratë – veçanërisht ato të arsimuara – kërkojnë partnerë të barabartë dhe marrëdhënie më të drejta.
Dhe kur nuk i gjejnë? Nuk pranojnë më të bëjnë kompromise.
Nëse trendi vazhdon, kjo mund të ndikojë edhe tek normat e lindjeve, sepse gratë refuzojnë të krijojnë familje në kushte pabarazie. Kështu që, nëse duam të ndryshojmë të ardhmen, ndoshta dashuria dhe barazia janë çelësi. Le të shpresojmë!/Living
Discussion about this post