‘Darka e fundit’: Ky është padyshim një nga takimet më të pazakonta që mund të zhvillojë një çift

Një video që tregon një çift duke darkuar në lartësi po bën bujë në internet.Të ulur përballë njëri-tjetrit në një tavolinë të lidhur me një litar, ata largohen ngadalë nga toka, duke u ngjitur lart mbi një luginë malore. Origjina e videos mbetet e panjohur, por një grua në sfond, me sa duket duke dhënë udhëzime, dëgjohet duke folur rusisht. Video u publikua në X, ku në pak orë mblodhi miliona shikime dhe ngjalli reagime të shumta.

“Cila është fjala e parë që ju vjen në mendje kur e shihni këtë”, thuhet në mbishkrimin e videos.

Shumë persona në komente theksuan mungesën e masave të sigurisë për dyshen e ulur në tavolinën e ngritur në ajër.

“Të paktën duhet të vendosin një rrip ose diçka tjetër në rast se bien”, shkroi një nga komentuesit.

“Darka e Fundit”, shkroi me shaka një tjetër. “Derisa vdekja të na ndajë, por vdekja është më shpejt se sa mendoni”, tha një tjetër përdorues i rrjetit social X.